Хадан нэһилиэгин олохтоохторо урут Улахан Сыһыы хоту өттүгэр бөһүөлэктэнэн олорбуттара. Бөһүөлэккэ кииннээн оскуола аһыллыбытыгар “Кыһыл Сыһыы”, Чапаев уонна Энгельс ааттарынан колхозтар оҕолоро үөрэммиттэрэ. 1933 сыллаахха бу оскуолаҕа “Ааҕар балаҕан” аһыллыбыта. “Отутус сыллардааҕы үөрэнээччилэр, биһиги, уруок кэнниттэн бэйэтэ да аҕыйах кинигэлээхпитин, ким тугу аахпытын мустан олорон сэһэргэһэрбит»,- диэн билиҥҥи кырдьаҕастар ахталлар. Сэрии кэнниттэн бөһүөлэги өрүскэ чугас, Агдаарыга көһөрбүттэрэ. Кулууп дьиэҕэ, кыра хоско библиотеканы олохтообуттара. Сылтан сыл ахсын саҥа кинигэ кэлиитэ элбээбитэ, хаһыат, сурунаал элбэх көрүҥэ сурутуллара, ааҕар киһи үксээбитэ. Кулууп кыараҕас хоһуттан библиотеканы 1977 сыллаахха эргэ маҕаһыын буолан турбут дьиэҕэ көһөрбүттэрэ. Ити кэмҥэ оройуон библиотекалара кииннэммит библиотечнай ситимҥэ киирбиттэрэ. 1982 сыллаахха Дормидонт Григорьевич Данилов туруорсуутунан саҥа кулууп тутуллан үлэҕэ киирбитэ. Библиотека сырдык хоско 2000 сылга дылы үлэлээбитэ. Ити сыл кулуубу көтүрбүттэрэ, атахха тутуллубут буолан олус тымныы этэ. Библиотека 2000-2006 сс. АТС-ка ананан тутуллубут дьиэҕэ (билиҥҥитэ учууталлар уопсайдара) үлэлээбитэ. 2006 сылтан “Оһуокай” КК көспүтэ. Библиотека — билиини тарҕатар киин, ааҕааччылар интэриэстэрин тардар, ыйытыктарыгар толору эппиэттиир сорук туруорунан үлэлиир.
Сэбиэдиссэйдэринэн үлэлээбиттэрэ:
Алексеев Данил Иванович – 1933-1936 сс.
Васильев Егор Павлович – 1938-1942 сс.
Решетникова Евгения Михайловна – 1947-1952 сс.
Федоров Петр Михайлович – 1952 с.
Чирикова Анастасия Петровна – 1952-1957 сс.
Мигалкина Розалия Николаевна – 1957-1959 сс.
Павлова Мария Егоровна – 1959-1963 сс.
Петрова Мария Дмитриевна – 1963-1968 сс.
Лукина Мария Яковлевна – 1968-1988 сс.
Лукина Елизавета Петровна – 1988-1989 сс.
Петрова Лариса Николаевна – 1989-1996 сс.
Кириллина Раиса Алексеевна – 1996-2018сс.
Оконешникова Ольга Махмудовна — 2018с.