Улуу сэрии кыайыытын 80 сылын бэлиэтиир тэрээһин ыам ыйын 1 күнүттэн саҕаланна. Ол курдук «Окна Победы» Всероссийскай акция, «Участники Великой Отечественной войны – наши земляки» оскуола оҕолоругар бэсиэдэлэр, «Читаем книги о войне» нэһилиэк библиотеката ыытар акция, «Эхо прошедшей войны», 5-9 кылаас оҕолоругар викторина, «Страницы книг расскажут о войне» тематическай кинигэ быыстапката үлэлээтэ.
Ыам ыйын 9 күнүгэр сарсыардаттан саҕалаан сэрии тыйыс сылларыгар күргүөмнээхтик үлэлээн кыайыыны чугаһатыспыт тыыл бэтэрээнин Иванов Н.Н. уонна сэрии сылын оҕолорун, Анал байыаннай дьайыы кыттыылаахтарын дьиэ кэргэннэрин өрөгөйдөөх бырааһынньыгынан Хадан нэһилиэгин баһылыга Оконешников А.Н. уонна олохтоох дьаһалта, култуура, сынньалаҥ киинин үлэһиттэрэ дьиэлэригэр тиийэн эҕэрдэлээтилэр. Үөрүүлээх, долгутуулаах быһыыга СӨ Ил Дархана Айсен Сергеевич Николаев анаабыт үбүлүөйдээх мэтээлин уонна сэмэй бэлэхтэри туттардылар. Ытык дьоммутугар чэгиэн-чэбдик туругу, этэҥҥэ буолууну баҕардылар. Аҕа дойду Улуу сэриитин кыттыылаахтарыгар туруоруллубут «Ким да умнуллубат, туох да умнуллубат!» пааматынньыкка өлбөөдүйбэт махтал бэлиэтин венок уурулунна. Нэһилиэкпит аҕа баһылыга А.Н.Оконешников тыыл бэтэрээннэригэр, сэрии оҕолоругар, мустубут дьоҥҥо анаан эҕэрдэтин эттэ. Кини бу үйэлэргэ умнуллубат Улуу Кыайыы суолтата сылтан сыл күүһүрэн, дириҥээн иһэрин бэлиэтээтэ. Кэлэр көлүөнэ Кыайыыны уһансыбыт ытык дьоммутун умнубатыгар, өрүү өйдүү-саныы, сүгүрүйэ туралларыгар ыҥырда. Өрөгөйдөөх парад кэнниттэн «Саллаат кухнята» үлэлээн, дьон саллаат паегун: гречка хааһыны, хара чэйи амсайдылар. Өрөгөйдөөх Кыайыы күнүнэн өйдөбүнньүк хаартыскаҕа түһэн, ааспыты ахтан, сэһэргэһии салҕанан барда. Кэнсиэр өрө көтөҕүүлээхтик барда, “Вальс Победы” үҥкүүлээн дьон сүргэтэ көтөҕүлүннэ.
Биһиги бүгүҥҥү көҥүл, иллээх-эйэлээх олоххо олорорбут туһугар, сир үрдүгэр фашизм суох буоларын туһугар биир сомоҕо буолан турууласпыт дьоммутун, история кэрдиис кэмин умнубат эбээһинэстээхпит. Аҕа дойдубутун чиэстээхтик көмүскээбит чулуу дьоммутугар махтанабыт, сүгүрүйэбит! Ким да умнуллубат, туох да умнуллубат!
