Сунтаар улууһугар нэһилиэктэр икки ардыларыгар ыытыллар норуот уус-уран айымньытын күрэһэ кулун тутар 19 күнүгэр күнүс 2 чаастан Хадан сиригэр, үһүс бөлөххө буолан ааста.
“Оллоонноон олорон олоҥхолуох” бөлөҕүнэн оҕолорго толорууга, орто сүһүөх оҕолоро 3 буолан сахалыы сайбаччы таҥастаах олорон Эрчимэн Бэргэн олоҥхоттон быһа тардыыны толордулар. Дьүүллүүр сүбэ Оконешникова А. талааннаах оҕо диэн бэлиэтии көрдө. “Ситим” үҥкүүнү эдэр ыччат 4 кыыс, 4 уол буолан толордулар. Үҥкүүнү Николаева М.Н. доллоһута туойан киэргэттэ. “Саха төрүт талба таҥаһын” түһүмэҕэ нэһилиэк дьонун бары түмтэ. Ол курдук оскуола коллектива, администрация үлэһиттэрэ, кулууп үлэһиттэрэ тех.үлэһиттэрэ туора турбакка, нэһилиэк тэрилтэлэрин салайааччылара бары тахсан сахалыы сайбаччы таҥнан хааман көрдөрдүлэр. “Сарсын сарсын сарсыарда” эр дьон бөлөҕө 8 буолан толору таҥастаах бэртээхэйдик толорон ытыс тыаһа ньиргийэн олордо. «Төрүт тыл сүмэтигэр» Нахов Иван, Данилов Данил, Сахатаев Эрик, Никифоров Рома С.А. Зверев -Кыыл Уола «Болдьох» диэн хоһоонун толордулар. “Төрүт дорҕоон” норуот ырыатыгар «Сыккыс» оскуола үлэһиттэрин коллектива «Талба, талба Татыйаана» ырыаны норуодунай инструменнарга оонньуу-оонньуу толордулар. Улахан дьоҥҥо П.П. Максимов «Ала хотой кыыл аттаах алтан дьааһын бухатыыр» олоҥхоттон быһа тардыыны эдэр ыччат толорон дьүүллүүр сүбэ биһирэбилин ылла. Барыта улахан дьон олоҥхону толоруутугар 6 киһи кытынна. «Сайылык үҥкүүтүгэр” оскуола оҕолоро, 4 кыыс уонна 2 уол саҥа тигиллибит таҥастаах тилийэ көтөн толорбуттаргар саала иһэ сырдыы түстэ. «Эр хоһуун доллоһута туойдаҕына» тойук көрүҥүгэр Роман Попов С.А.Зверев — Кыыл уола «Баҕах тойугун» толордо. Дьүүллүүр сүбэ таҥаһын -сабын, туттан турарыгар тиийэ хайҕаата. Улууска киирэн кыттарыгар сүбэлээтилэр. «Алгыстаах оһуокайга” оҕолорго Чойнова Злата, Сергеев дамир, улахан дьоҥҥо Чойнова С.М., Архипов О.Г. таһаардылар. Түһүмэхтэрин тутуһуннаран, оҕолору улууска киллэрэн үбүөлүөйдээх оһуокайга кытыннаралларыгар, үлэ ыыталларыгар дьүүллүүр сүбэ сүбэлээтэ. Барыта 60 -ча киһи оһуокайга киирдилэр. Саҥа этээччилэр Ыһыахха кытталларыгар түмүккэ этилиннэ. Ирдэммит бары көрүҥнэр бааллар диэн дьүүллүүр сүбэ бэлиэтээтэ.
