Кулун тутар 5 күнүгэр Сунтаар технологическай колледжын дьиэтигэр Леонид Попов аатынан киин бибилэтиэкэ уонна Кэмпэндээйи модельнай бибилэтиэкэтэ тэрийэр “Биһиги умнубаппыт. Мы помним” улуустааҕы историко-краеведчэскэй, научнай-практическай конференция VI-с төгүлүн ыытылынна. Арассыыйаҕа Аҕа дойдуну, өрөспүүбүлүкэҕэ Ийэ дойдуну көмүскээччилэрин уонна Улуу Кыайыы 80 сылларыгар аналлаах быйылгы конференция икки түһүмэҕинэн тэрилиннэ: айар үлэлэр күрэстэрэ (буктрейлер, хоһоон уус-уран ааҕыыта, хоһоон айыы, видеоролик) кэтэхтэн ыытылынна уонна иккис түһүмэх – 4 секциянан билим-чинчийэр үлэлэри экспертар көрдүлэр-иһиттилэр. Конференцияҕа барыта холбоон 58 үлэ киирэн кыттыыны ылла.
Иккискэ – “Аҕа дойду сэриитин буойуннара: сураҕа суох сүппүттэрэ, сэрии толоонугар охтубуттар, Кыайыы өрөгөйүн билбит сэрии бэтэрээннэрэ” – 28 кыттааччы (19 оҕо, 9 улахан киһи) үлэтэ киирдэ. Бу секцияҕа Сергеев Дамир кыттыыны ылла.
Үһүс секцияҕа – “Бары күүһү фроҥҥа: тыыл үлэһиттэрэ, сэрии бэтэрээннэрэ” – 15 кыттааччы, олортон 6 оҕо, 9 улахан киһи. бу секцияҕа олохтоох библиотека сэбиэдиссэйэ Оконешникова О.М. кыттыыны ылла.
Төрдүс секцияҕа – “Сунтаардар Ийэ дойду көмүскэлигэр: Афганистан, Чечня, Сирия сэриилэрин уонна Украинаҕа байыаннай дьайыы кыттыылаахтара” – барыта 10 кыттааччы: 6 оҕо, 4 улахан киһи. Бу секцияҕа биһиги нэһилиэктэн 2 миэстэни Эрик Сахатаев «Хадан нэһилиэгин буойуттара анал байыаннай дьайыыга» диэн дакылаатынан ылла, салайааччы Кириллина К.Г.
Ону таһынан, анал байыаннай дьайыыга кытта сылдьар Хадан уолаттарын дьонуттан харчынан бириэмийэни Хадан ыччатыгар Эрик Сахатаевка биэрдилэр. Хадан нэһилиэгин олохтооҕо, сэрии бэтэрээнэ Григорий Степанович Кугасов аймахтара бириэмийэтин оҕолоро, сиэннэрэ Сунтаар 1- №-дээх оскуолатын үөрэнээччитигэр Степан Охлопковка анаатылар. Хадантан сэрии кыттыылааҕа Илья Алексеевич Иванов аатынан анал бириэмийэни Дамир Сергеевка бэлэхтээтилэр.
